Sýningin var opnuð 22. febrúar 2025 og er sett upp sem hluti af safnfræðslu, með það markmið að gera sýnilegt og örva skapandi starf barna á aldrinum fimm til sextán ára. Þátttakendur hverju sinni eru skólabörn og starfandi myndlistarmenn.

Í ár var myndhöggvaranum Sólveigu Baldursdóttur boðin þátttaka í verkefninu. Einkasýning hennar, Augnablik – til baka, var opnuð í Listasafninu í nóvember 2024, en nú hefur sýningin umbreyst og ný orðið til: Sköpun bernskunnar 2025. Á sýningunni má sjá skúlptúra Sólveigar í nýju samhengi og í áhugaverðu samtali við verk barnanna.

Skólarnir sem taka þátt að þessu sinni eru leikskólinn Hólmasól og grunnskólarnir Giljaskóli, Hlíðarskóli, Lundarskóli, Oddeyrarskóli og Síðuskóli. Í vetur komu skólabörnin ásamt kennara sínum í Listasafnið og unnu verk sín fyrir sýninguna undir handleiðslu listamannsins. Þar fengu þau tækifæri til að kynnast Sólveigu og nota skúlptúra hennar sem innblástur í eigin sköpun.

*Aðgangseyrir inn á safnið - frítt fyrir 18 ára og yngri.