Búðu þig undir ógleymanleg Jól í Hofi. Stórsöngkonurnar Margrét Eir, Hera Björk og Dísella munu flytja helstu jólaperlur Frostrósa á einstökum jólatónleikum í Hofi í desember. Öll umgjörð verður hin glæsilegasta og með þeim verða á sviði einvala hljómsveit, strengjasveit, dýrindis kórar og frábærir gestir.

Sérstakur gestur: Stefán Hilmarsson

Þær Heru og Margréti þarf vart að kynna. Þær hafa verið vinkonur í yfir 30 ár og voru þær söngkonur sem oftast heiðruðu svið Frostrósa. Í fyrra voru þær í forgrunni tónleikanna Jól í Eldborg sem slógu rækilega í gegn og verða haldnir aftur í ár. Nú koma þær einnig hingað norður í Hof og í ár bætist Grammy verðlaunahafinn Dísella Lárusdóttir við en hún var einn gesta tónleikanna í fyrra. Dísella kom fram með Frostrósum árin 2008 og 2011 þar sem hún skapaði ógleymanlegt augnablik er hún flutti dúett með Garðari Thór Cortes beint frá New York.

Þessar frábæru söngkonur ætla á ný að töfra fram einstök augnablik er þær leiða viðstadda inn í fallegan jólaheim. Flest okkar hér á Íslandi þekkjum Frostrósatónleikana sem haldnir voru ár hvert í 12 ár samfleytt frá 2002-1013. Yfir 30.000 manns sóttu tónleikana árlega þegar mest var og eigum við mörg þaðan ljúfar minningar. Lögin lifa áfram og hvert mannsbarn þekkir lög eins og Dansaðu vindur, Hugurinn fer hærra og Af álfum svo nokkur séu nefnd.

Sjáumst í hátíðarskapi í Hofi laugardaginn 14. desember. Þetta verður sannkölluð veisla.

Fyrirspurnir varðandi hópa (10 manns eða fleiri) sendist á samuel.kristjansson@gmail.com

https://www.facebook.com/frostrosir/ Fylgið Frostrósum á Facebook en þar verður hægt að skyggnast á bakvið tjöldin við undirbúning tónleikanna og rifjuð verða upp skemmtileg augnablik úr sögu Frostrósa.