Sunneva Halldórsdóttir heldur úti instagram síðunni Efnasúpan. Sunneva er 26 ára mastersnemi í Líf-og Læknavísindum við Háskóla Íslands. Hún er að vinna að rannsókn sem snýr að því að kanna hvort hún finni svokölluð PFAS efni í brjóstamjólk og blóði íslenskra kvenna, og hvort hún geti dregið ályktun um hvaðan slík efni eru að berast.
Í fæðingarorlofinu sínu í vor ákvað Sunneva að búa til instagram síðuna þar sem hún setur inn fræðslur um skaðleg efni, og efni almennt í umhverfinu okkar og reynir að hafa þær á "mannamáli". Miðillinn fékk ótrúlega góðar viðtökur og hefur stækkað ört á síðustu mánuðum. Efnasúpan leynist ekki síst í kringum börnin okkar en við höfum sem betur fer mörg tækifæri til að vanda valið, skipta hlutum út, vera meðvituð og kveikja á gagnrýnu hugsuninni.
Sunneva kemur til okkar 18. febrúar og kennir okkur að vera meðvituð um efnasúpuna í kringum okkur og hvernig við getum vandað valið þegar við veljum efnivið fyrir börnin okkar.