Skólavarðan

Skólavarða er efst á Vaðlaheiði, sunnan Veigastaðavatns. Varðan var hlaðin um 1930 af nemendum Menntaskólans á Akureyri. Falleg og vinsæl gönguleið liggur að Skólavörðu en þaðan er mikið útsýni yfir Eyjafjörð og Akureyri handan fjarðar.

Hægt er að velja um þrjár mismunandi leiðir.

Leið A 
Gangan hefst skammt fyrir ofan gatnamótin á Veigastaðavegi og gamla Vaðlaheiðavegi en þar er skilti merkt Skólavarða við veginn og hægt að leggja bílum í vegarkantinum. Sé fólk á fjórhjóladrifsbíl er hægt að keyra fyrstu 2-300 metrana eftir grófum slóða og þar sem hann endar er annað skilti. Leiðin upp að skólavörðunni er stikuð og fremur auðveld yfirferðar en þó nokkuð brött og blaut á köflum.
Upphafspunktur leiðarinnar er hér.
Bröttustu kaflarnir eru fljótlega eftir að gangan hefst þar sem krækt er suður fyrir svokallaða Veigastaðakletta og síðan er brattur en stuttur kafli upp á há heiðina, skömmu áður en komið er að vörðunni. Þaðan er fallegt útsýni yfir Akureyri og inn og út Eyjafjörðinn. Sjá kort neðar á síðunni og einnig á meðfylgjandi hlekk á vef Ferðamálastofu þar sem einnig má nálgast leiðina sem GPX skrá.

Leið B 
Upphafspunkturinn er við Eyrarland, við Veigastaðaveginn en aðeins sunnar/neðar en leið A). Þar má finna skilti við veginn merkt Skólavarða. Leiðin er stikuð og fremur auðveld yfirferðar ekki eins brött og leið A, en lengri.  Hún er einnig hluti af leiðinni um Þingmannaleiðinna og upp á Þingmannahnjúk en til að komast að vörðunni er beygt af til norðurs þegar ofar kemur og sem leið liggur að Skólavörðunni. Þaðan sem fallegt útsýni er yfir Akureyri og inn og út Eyjafjörðinn. 

Leið C
Liggur frá gamla Vaðlaheiðaveginum. Upphafspunkturinn (Hnit: 65.742122, -18.002652) er efst uppi á heiðinni, en þar má finna vegslóða sem fylgt er inn að vörðunni. Annaðhvort þarf að ganga upp á heiðina eftir gamla Vaðlaheiðaveginum eða aka. Athugið að vegurinn er malarvegur sem er aðeins opinn umferð yfir há sumarið. Hann er ekki þjónustaður og ekki góður yfirferðar fyrir minni bíla.

Leiðin suður að Skólavörðu frá há heiðinni er um 6,5 km, fremur auðveld yfirferðar og nokkuð slétt. Hún hentar einnig fyrir fjallahjól. Þó ber að gæta þess að hún getur verið blaut lengi fram eftir sumri og jafnvel allt sumarið. Af leiðinni er fallegt útsýni yfir Akureyri og inn og út Eyjafjörðinn.

Sjá leið A á googlemaps

Leið A á Google Maps og á Wickiloc.com

Skólavarða on Trailforks.com