Böð

Á Norðurlandi má finna fleiri einstaka og skemmtilega baðstaði fyrir utan sundlaugarnar sem alltaf standa fyrir sínu

Má þar m.a. nefna
1) Skógarböðin í Eyjafjarðarsveit (u.þ.b. 4 km / 5 mínútna akstur frá Akureyri)
2) Bjórböðin á Árskógssandi (u.þ.b. 30 km / 25 mínútna akstur frá Akureyri)
3) Heitu pottana á Hauganesi og sjósundaðstöðu (u.þ.b. 30 km / 25 mínútna akstur frá Akureyri)
4) Jarðböðin í Mývatnssveit (u.þ.b. 75 km / 65 mín akstur frá Akureyri)
5) Sjóböðin á Húsavík (u.þ.b. 60 km /60 mín akstur frá Akureyri)
6) Grettislaug við Sauðárkrók (u.þ.b. 130 km / 1.5 klst akstur frá Akureyri)

Sjá nánar hér fyrir neðan

Skógarböð
Vaðlaskógur/Vaðlareitur  
IS-605 Akureyri
Sími: 585 0090
Netfang: info@forestlagoon.is
Heimasíða: www.forestlagoon.is
Skógarböðin eru náttúrulaugar, staðsettar í Vaðlaheiði gegnt Akureyri. Á svæðinu er hægt að njóta heitra lauganna, fara í þurrsánu eða baða sig í kaldri laug, tveir barir eru staðsettir við laugarnar. Á staðnum er einnig að finna Bistró þar sem gestir geta notið veitinga, setið við arineld og horft yfir Akureyri og út fjörðinn í einstöku umhverfi.  Mikill metnaður hefur verið lagður í alla hönnun baðanna og að gestir þeirra upplifi útsýnið, kyrrðina og orku skógarins sem umlykur böðin.

Eins og nafnið gefur til kynna standa böðin í skógi sem er sérstaða Skógarbaðanna. Skóginum fylgir mikil veðursæld og leikur veigamikið hlutverk í upplifuninni sem og vatnið sem fannst við gerð Vaðlaheiðargangnanna og hefur nú fengið nýjan og göfugri tilgang.

Björböðin
Öldugötu 22, IS-621 Árskógssandur
Sími: 466 2505 / 699 0715
Netfang: bjorbodin@bjorbodin.is
Heimasíða: www.bjorbodin.is
Kerin eru 7 talsins og getum við því tekið á móti 14 manns á klukkutíma. Það er í boði að fara einn eða tveir saman.
Það er ekkert aldurstakmark í bjórbað þar sem bjórvatnið er ódrykkjarhæft en bjórdæla er við hvert bað fyrir þá sem eru 20 ára og eldri.
16 ára og yngri þurfa að koma í fylgd með fullorðnum.